ਓਟਵਾ: ਕੰਜ਼ਰਵੇਟਿਵ ਪਾਰਟੀ ਦੇ ਆਗੂ ਤੇ ਮੁੱਖ ਵਿਰੋਧੀ ਧਿਰ ਦੇ ਨੇਤਾ ਪਿਏਰ ਪੌਲੀਏਵਰ ਵੱਲੋਂ ਇੱਕ ਬਿਆਨ ਜਾਰੀ ਕਰਕੇ ਬੈਂਕ ਆਫ ਕੈਨੇਡਾ ਵੱਲੋਂ ਮੁੜ ਵਧਾਈਆਂ ਗਈਆਂ ਵਿਆਜ਼ ਦਰਾਂ ਦੀ ਨਿਖੇਧੀ ਕੀਤੀ ਗਈ।
ਬਿਆਨ ਵਿੱਚ ਪੌਲੀਏਵਰ ਨੇ ਆਖਿਆ ਕਿ ਬੈਂਕ ਆਫ ਕੈਨੇਡਾ ਵੱਲੋਂ ਵਿਆਜ਼ ਦਰਾਂ ਵਿੱਚ 0·5 ਫੀ ਸਦੀ ਦਾ ਹੋਰ ਵਾਧਾ ਕੀਤਾ ਗਿਆ ਹੈ।ਇਸ ਤਰ੍ਹਾਂ ਦੇ ਕੀਤੇ ਜਾ ਰਹੇ ਵਾਧਿਆਂ ਕਾਰਨ ਕੈਨੇਡੀਅਨਜ਼ ਨੂੰ ਆਪਣੀਆਂ ਮਾਰਗੇਜ, ਕਰਜਿ਼ਆਂ ਤੇ ਜਸਟਿਨ ਟਰੂਡੋ ਦਾ ਕਰਜ਼ਾ ਲਾਹੁਣ ਲਈ ਹਜ਼ਾਰਾਂ ਡਾਲਰ ਵੱਧ ਅਦਾ ਕਰਨੇ ਪੈ ਰਹੇ ਹਨ।ਬਹੁਤ ਸਾਰੇ ਕੈਨੇਡੀਅਨਜ਼ ਦਾ ਪਹਿਲਾਂ ਹੀ ਜੂਨ ਗੁਜ਼ਾਰਾ ਮੁਸ਼ਕਲ ਨਾਲ ਚੱਲ ਰਿਹਾ ਹੈ ਤੇ ਉਸ ਉੱਤੇ ਇਸ ਤਰ੍ਹਾਂ ਵਿਆਜ਼ ਦਰਾਂ ਵਿੱਚ ਵਾਧਾ ਕੀਤੇ ਜਾਣ ਨਾਲ ਕੈਨੇਡੀਅਨਜ਼ ਸਿਰ ਮੁਸੀਬਤਾਂ ਦਾ ਵੱਡਾ ਪਹਾੜ ਹੋਰ ਡਿੱਗ ਜਾਵੇਗਾ।
ਉਨ੍ਹਾਂ ਆਖਿਆ ਕਿ ਲੋਕਾਂ ਨੂੰ ਆਪਣਾ ਢਿੱਡ ਭਰਨ ਲਈ ਤੇ ਆਪਣੇ ਘਰਾਂ ਨੂੰ ਸਿਆਲਾਂ ਵਿੱਚ ਨਿੱਘਾ ਰੱਖਣ ਲਈ, ਕਾਰਾਂ ਵਿੱਚ ਗੈਸ ਭਰਵਾਉਣ ਲਈ ਤੇ ਆਪਣੀਆ ਮਾਰਗੇਜ ਅਦਾ ਕਰਨ ਲਈ ਹੋਰ ਕਰਜ਼ਾ ਚੁੱਕਣਾ ਪੈ ਰਿਹਾ ਹੈ। ਇਸ ਸਾਲ ਦੂਜੀ ਛਿਮਾਹੀ ਵਿੱਚ ਇਹ ਕਰਜ਼ਾ 2·32 ਟ੍ਰਿਲੀਅਨ ਤੱਕ ਪਹੁੰਚ ਚੁੱਕਿਆ ਹੈ ਜੋ ਕਿ ਪਿਛਲੇ ਸਾਲ ਇਸ ਅਰਸੇ ਦੌਰਾਨ ਨਾਲੋਂ 8·2 ਫੀ ਸਦੀ ਵੱਧ ਹੈ। ਪੌਲੀਏਵਰ ਨੇ ਅੱਗੇ ਆਖਿਆ ਕਿ ਟਰੂਡੋ ਤੇ ਉਨ੍ਹਾਂ ਦੀ ਮੁੱਦਰਾਸਫਿਤੀ ਦੇ ਘਾਟੇ ਦੀ ਮਿਹਰਬਾਨੀ ਸਦਕਾ ਇਸ ਕਰਜ਼ੇ ਉੱਤੇ ਹੋਰ ਲਾਗਤ ਆਵੇਗੀ।
ਕੈਨੇਡੀਅਨਜ਼ ਕੋਲ ਪੈਸੇ ਨਹੀਂ ਹਨ ਤੇ ਇਸ ਸੱਭ ਦਾ ਹੱਲ ਕੱਢਣ ਲਈ ਟਰੂਡੋ ਕੋਈ ਹੱਥ ਪੱਲਾ ਨਹੀਂ ਫੜਾ ਰਹੇ। ਸਰਕਾਰੀ ਖਰਚਿਆਂ ਕਾਰਨ ਰਹਿਣੀ ਸਹਿਣੀ ਵੀ ਦਿਨੋਂ ਦਿਨ ਮਹਿੰਗੀ ਹੁੰਦੀ ਜਾ ਰਹੀ ਹੈ। ਟਰੂਡੋ ਨੇ ਕੈਨੇਡਾ ਸਿਰ ਚੜ੍ਹੇ ਕਰਜੇ਼ ਨੂੰ ਨਾ ਸਿਰਫ ਦੁੱਗਣਾ ਕੀਤਾ ਹੈ ਸਗੋਂ ਕੈਨੇਡਾ ਦੇ ਹੁਣ ਤੱਕ ਰਹੇ ਸਾਰੇ ਪ੍ਰਧਾਨ ਮੰਤਰੀਆਂ ਨਾਲੋਂ ਦੇਸ਼ ਸਿਰ ਚੜ੍ਹੇ ਕਰਜ਼ੇ ਨੂੰ ਹੋਰ ਵਧਾਇਆ ਹੈ।
ਪੌਲੀਏਵਰ ਨੇ ਆਖਿਆ ਕਿ ਟਰੂਡੋ ਸਰਕਾਰ ਵੱਲੋਂ ਲਿਆਂਦੀ ਗਈ ਮਹਿੰਗਾਈ ਰੂਪੀ ਮੁਸੀਬਤ ਨਾਲ ਸਿੱਝਣ ਲਈ ਉਨ੍ਹਾਂ ਦੀ ਪਾਰਟੀ ਕੋਲ ਪਲੈਨ ਹੈ। ਉਨ੍ਹਾਂ ਆਖਿਆ ਕਿ ਅਸੀਂ ਸਰਕਾਰ ਦੇ ਖਰਚਿਆਂ ਉੱਤੇ ਨਕੇਲ ਕੱਸਾਂਗੇ, ਅਸੀਂ ਹੋਰ ਐਨਰਜੀ ਬਣਾਵਾਂਗੇ, ਖਾਣੇ ਤੇ ਘਰਾਂ ਦੀ ਕੋਈ ਕਮੀ ਨਹੀਂ ਰਹਿਣ ਦੇਵਾਂਗੇ ਤੇ ਅਸੀਂ ਕਾਰਬਨ ਟੈਕਸ ਦਾ ਸਫਾਇਆ ਵੀ ਕਰਾਂਗੇ। ਕੈਨੇਡੀਅਨਜ਼ ਹੁਣ ਜਸਟਿਨ ਟਰੂਡੋ ਤੇ ਉਨ੍ਹਾਂ ਦੇ ਮਹਿੰਗੇ ਗੱਠਜੋੜ ਨੂੰ ਹੋਰ ਸਹਾਰ ਨਹੀਂ ਸਕਦੇ।ਹੁਣ ਇੱਕ ਇੱਕ ਪਾਈ ਮੁੜ ਓਟਵਾ ਲਿਆਉਣ ਦਾ ਸਮਾਂ ਆ ਗਿਆ ਹੈ।