ਸੰਸਦ ਦੇ ਮਾਨਸੂਨ ਸੈਸ਼ਨ ਵਿਚ ਬੇਭਰੋਸਗੀ ਮਤੇ ‘ਤੇ ਦੂਜੇ ਦਿਨ ਦੀ ਬਹਿਸ ਰਾਹੁਲ ਗਾਂਧੀ ਦੇ ਭਾਸ਼ਣ ਨਾਲ ਸ਼ੁਰੂ ਹੋਈ। ਰਾਹੁਲ ਨੇ ਆਪਣੇ 35 ਮਿੰਟ ਦੇ ਭਾਸ਼ਣ ਵਿਚ ਭਾਰਤ ਜੋੜੋ ਯਾਤਰਾ ਅਤੇ ਮਨੀਪੁਰ ਬਾਰੇ ਗੱਲ ਕੀਤੀ।
ਰਾਹੁਲ ਨੇ ਕਿਹਾ ਕਿ ਸਾਡੇ ਪ੍ਰਧਾਨ ਮੰਤਰੀ ਨੇ ਅੱਜ ਤੱਕ ਮਨੀਪੁਰ ਦਾ ਦੌਰਾ ਨਹੀਂ ਕੀਤਾ। ਮਨੀਪੁਰ ਉਨ੍ਹਾਂ ਲਈ ਭਾਰਤ ਨਹੀਂ ਹੈ। ਮੈਂ ਰਾਹਤ ਕੈਂਪ ਵਿੱਚ ਗਿਆ। ਔਰਤਾਂ ਅਤੇ ਬੱਚਿਆਂ ਨਾਲ ਗੱਲਬਾਤ ਕੀਤੀ। ਪ੍ਰਧਾਨ ਮੰਤਰੀ ਨੇ ਅੱਜ ਤੱਕ ਅਜਿਹਾ ਨਹੀਂ ਕੀਤਾ।
ਰਾਹੁਲ ਨੇ ਕਿਹਾ ਕਿ ਫੌਜ ਇੱਕ ਦਿਨ ਵਿੱਚ ਉੱਥੇ ਸ਼ਾਂਤੀ ਲਿਆ ਸਕਦੀ ਹੈ। ਤੁਸੀਂ ਅਜਿਹਾ ਇਸ ਲਈ ਨਹੀਂ ਕਰ ਰਹੇ ਕਿਉਂਕਿ ਤੁਸੀਂ ਭਾਰਤ ਵਿੱਚ ਮਨੀਪੁਰ ਨੂੰ ਮਾਰਨਾ ਚਾਹੁੰਦੇ ਹੋ। ਤੁਸੀਂ ਭਾਰਤ ਮਾਤਾ ਦੇ ਰਾਖੇ ਨਹੀਂ ਹੋ, ਤੁਸੀਂ ਭਾਰਤ ਮਾਤਾ ਦੇ ਕਾਤਲ ਹੋ।
ਰਾਹੁਲ ਦੇ ਭਾਸ਼ਣ ਦੇ ਜਵਾਬ ‘ਚ ਕੇਂਦਰੀ ਮੰਤਰੀ ਸਮ੍ਰਿਤੀ ਇਰਾਨੀ ਨੇ ਕਿਹਾ ਕਿ ਰਾਹੁਲ ਭਾਰਤ ਮਾਤਾ ਨੂੰ ਮਾਰਨ ਦੀ ਗੱਲ ਕਰਦੇ ਹਨ। ਕਾਂਗਰਸੀ ਤਾੜੀਆਂ ਵਜਾਉਂਦੇ ਹਨ। ਇਹ ਇਸ ਗੱਲ ਦਾ ਸੰਕੇਤ ਹੈ ਕਿ ਕਿਸ ਦੇ ਮਨ ਵਿੱਚ ਵਿਸ਼ਵਾਸਘਾਤ ਹੈ। ਸਮ੍ਰਿਤੀ ਨੇ ਰਾਹੁਲ ਗਾਂਧੀ ‘ਤੇ ਮਹਿਲਾ ਸੰਸਦ ਮੈਂਬਰਾਂ ਨਾਲ ਦੁਰਵਿਵਹਾਰ ਕਰਨ ਦਾ ਦੋਸ਼ ਲਗਾਇਆ ਹੈ। ਭਾਜਪਾ ਨੇ ਇਸ ਦੀ ਸਿ਼ਕਾਇਤ ਸਪੀਕਰ ਨੂੰ ਕੀਤੀ ਹੈ।
ਰਾਹੁਲ ਨੇ ਕਿਹਾ ਕਿ ਜਿਵੇਂ ਮੈਂ ਭਾਸ਼ਣ ਦੀ ਸ਼ੁਰੂਆਤ ਵਿੱਚ ਕਿਹਾ ਸੀ ਕਿ ਭਾਰਤ ਇੱਕ ਆਵਾਜ਼ ਹੈ। ਇਹ ਜਨਤਾ ਦੀ ਆਵਾਜ਼ ਹੈ, ਇਹ ਦਿਲ ਦੀ ਆਵਾਜ਼ ਹੈ। ਤੁਸੀਂ ਮਨੀਪੁਰ ਵਿੱਚ ਉਸ ਆਵਾਜ਼ ਨੂੰ ਮਾਰਿਆ, ਮਤਲਬ ਕਿ ਤੁਸੀਂ ਮਨੀਪੁਰ ਵਿੱਚ ਭਾਰਤ ਮਾਤਾ ਨੂੰ ਮਾਰਿਆ। ਤੁਸੀਂ ਗੱਦਾਰ ਹੋ, ਦੇਸ਼ ਭਗਤ ਨਹੀਂ ਹੋ। ਇਸ ਲਈ ਤੁਹਾਡਾ ਪ੍ਰਧਾਨ ਮੰਤਰੀ ਮਨੀਪੁਰ ਨਹੀਂ ਜਾ ਸਕਦਾ, ਕਿਉਂਕਿ ਉਸ ਨੇ ਮਨੀਪੁਰ ਵਿੱਚ ਭਾਰਤ ਮਾਤਾ ਨੂੰ ਮਾਰਿਆ ਹੈ। ਤੁਸੀਂ ਭਾਰਤ ਮਾਤਾ ਦੇ ਰਾਖੇ ਨਹੀਂ ਹੋ, ਤੁਸੀਂ ਭਾਰਤ ਮਾਤਾ ਦੇ ਕਾਤਲ ਹੋ।
ਸਪੀਕਰ ਬਿਰਲਾ ਨੇ ਕਿਹਾ ਕਿ ਭਾਰਤ ਮਾਤਾ ਸਾਡੀ ਮਾਂ ਹੈ, ਸਦਨ ‘ਚ ਬੋਲਦੇ ਸਮੇਂ ਮਰਿਆਦਾ ਦਾ ਧਿਆਨ ਰੱਖੋ। ਇਸ ‘ਤੇ ਰਾਹੁਲ ਨੇ ਕਿਹਾ ਕਿ ਮੈਂ ਆਪਣੀ ਮਾਂ ਦੀ ਗੱਲ ਕਰ ਰਿਹਾ ਹਾਂ। ਤੁਸੀਂ ਮਨੀਪੁਰ ਵਿੱਚ ਮੇਰੀ ਮਾਂ ਨੂੰ ਮਾਰਿਆ ਹੈ। ਇੱਕ ਮਾਂ ਇੱਥੇ ਬੈਠੀ ਹੈ, ਤੁਸੀਂ ਦੂਜੀ ਨੂੰ ਮਨੀਪੁਰ ਵਿੱਚ ਮਾਰਿਆ ਹੈ।